30 أبريل 2009

سياسة الضفدع ذو الثلاثة ارواح !!




في يوم وانا بعدي الكورنيش كان قدامي احتمالين للتعدية .
الأول .. النفق .. التاني .. الجري بين العربيات 
بما ان النفق كان بعيد نسبيا حوالي 300 متر .. قررت مراوغة العربيات .. حطيت الخطة التمام وفي انتظار اللحظة المناسبة.
وانا مستني اللحظة دي .. لقيت ان عدد الحارات كان بين 8 - 10 رايح وجاي .. وقلت لنفسي .. ما هي احتالات نجاح الخطة وعبور الحارات كلها سليم 

وفجأة افتكرت لعبة كنت بلعبها عالطول علي جهاز الآتاري .. اللعبة عبارة عن ضفدع بيعدي الشارع اللي مليان عريبات ومهمتك انك تعدية الشارع من غير ما يداس .. ورغم مهارتي الرهيبة في تلك اللعبة كانت الضفدع بيتهرس مني !!

وهنا قررت عدم المقارنة بيني وبين الضفدع التعيس .. الضفدع كان عندة 3 ارواح قبل الgame over وكنت بخسر .. امال لو روح واحدة اعمل بيها ايه .

ومشيت ال300 متر بكل فخر رافض فكرة اني اشوف كلمة GAME OVER .. لكن دا ممنعيش من اني اتفرج بطرف عنيا علي الضفادع التانية .. اقصد الناس وهيا بتلعب لعبة "frog cross street".