16 فبراير 2010

عم محمد ابن بيرم التونسي





قبل ما نبدأ الكلام : في سطر مين هو بيرم التونسي؟

بيرم التونسي من اشهر شعراء العامية في مصر اتولد في اسكندرية وله اصول تونسية

نبدأ حكاية عم محمد
عم محمد كان راجل غلبان ساكن في العمارة اللي جنبنا .. كل يوم الصبح ينزل مش عارف بيروح فين و يرجع اخر النهار
في يوم سألت عليه .. وعرفت انه ابن بيرم التونسي .. بيرم التونسي حتة واحدة .. قولت مش باين عليه يعني .. لكن هو كان ازاي ممكن يبان عليه ؟؟سؤال وجية .. كان ممكن يكون كاتب او شاعر او اي شئ امتداد لشئ من ابوة
بعد كام سنه توفي الراجل .. و صاحب البيت حب يفضي الشقة اللي كان ساكن فيها وهنا كانت الصدمة .. صادف خروجي من البيت وقت تفضية شقة عم محمد .. الشقة كلها عبارة عن مكتبة الأسكندرية مصغرة .. كم هائل من الكتب ورثها عن والدة . والشئ المحزن ان سعيد الحظ اللي فاز بالكتب دي كلها تفتكروا مين ؟؟ بتاع الروبابيكيا .. ودة كان اكتر شئ حيجنني .. الكنز دة ياخدة واحد بتاع روبابيكيا العربية جت فاضية خالص ومقدرتش تلم الكتب كلها .. سعيد الحظ قال : سبيوا الكتب زي ما هي انا حرجع اخد الباقي
كان نفسي لحظتها اقوله انت عارف كتب مين دي يا جزمة اللي انتا ناوي تبيعها علي الرصيف
وطبعا كنت عايز اخد كام كتاب ذكري .. بس محصلش اي حاجة من اللي كان نفسي فيه
وانتهي ميراث بيرم التونسي علي الأرصفة
مدونه عن بيرم التونسي واشعاره: بيرم التونسى

فريد سالم
16/2/2010

02 فبراير 2010

خواطر وتساؤلات 1

10 خواطر
1

احد اكتشافاتي العلمية الهامة : اكبر مخدر يتم تعاطية بصورة جماعية هو بلا شك الكورة

كام واحد عارف عارف اسماء تشكيل المنتخب الوطني وكام واحد عارف اسماء 10 وزراء مصريين ؟

في نقاش لقضايا الفساد في البرلمان الليبي وقف نائب عجوز ورفع عصاه اللي علي شكل ل مقلوبة وقال منين العصا معوجة .. ما اعظم هذا التشبية

ليه ديماٌ مشاهد الجنس والأغتصاب في السنيما المصرية القديمة بيعملوا زووم علي النجف ؟

ليه ديماٌ بنسمي الهبل والسذاجة طيبة رغم ان ممكن الشخص يكون اهبل وشرير ؟

ليه ديماٌ بننشر في الجرايد خبر رفض موظف لرشوة كبيرة ممكن عشان دة امر غير اعتيادي يجب ذكرة في الصحف؟

الرساله الأخلاقية اللي طلعت بيها من فيلم مافيا الا وهي : مهما كانت امك وحشة لازم تحبها عشان هي مصر .. اقصد امك

من الحاجات اللي بتنرفزني جمله : مصر ام الدنيا .. وجة القرموطي فسرها اكتر وقال : يعني ام اميركا واللي جابوا امريكا .. ليه بقي

كل ما اشوف اعلان تي اي داتا بتاع ليه تزنق نفسك واحنا عندنا 70% من سعة الأنترنت في مصر افتكر ان مصر نفسها مزنوقة في 3.5% من مساحتها الكلية

من سمات المجتمعات التافة : نجوم الغناة والفن والكورة من اصحاب الكلامات المسموعة