01 مارس 2010

مين الأكبر الأرض ولا الشمس ولا الحياه ؟

السؤال دة اتسألته من طفل عمره اقل من 10 سنين .. اجابتة بسيطة جدا ولقيت نفسي بجاوب حتي من غير ما استوعب السؤال.

الشمس اكبر طبعا .. انتا تعرف ان الشمس ممكن تحط جواها مليون ارض ؟

طيب ليه كلنا عايشين في الأرض والشمس اكبر ؟ دة كان ردة

طبعا وضحت ليه الفرق بين الكوكب والنجم وكان درس جولوجيا تقيل عليه

لكن رجعت سألت نفسي السؤال تاني واكشفت ان الأرض الأكبر علي الأقل للبشر

ايه فايدة المساحة من غير استغلال .. ايه فايدة الكم من غير الكيف ؟

ايه فايدة ان مصر مليون كيلو متر مكعب و احنا عايشين في اقل من 10% من المساحة ؟

وفجأه طبقت القانون دة علي كل شئ حوليا ؟ ولقيته فعال جدا مثلا :

ايه فايدة الأكل الكتير و انتا متقدرش تاكل غير طبق واحد ؟

ايه فايدة الأصحاب الكتير وانتا متقدرش تأتمن حد علي سر ؟

ايه فايدة العمر الطويل او الفلوس الكتير او اي شئ ؟

واكتشفت كم كبير من الأمثال بيدعو الي الزيادة والكثرة من نوع البحر بيحب الزيادة

ومايملاش عين البني ادم غير التراب .... الخ الخ

وان طبيعة الأنسان جشعة .

يحب يسكن في القصر بدل الشقة .. يحب يكون عندة 100 مليون بدل 10مليون

يحب السلطة والنفوذ والأمتلاك لاي شئ ممكن .

اذكر في حوار للشيخ (صالح كامل) مالك قنوات الايه ار تي .. قال ان الخدامين عندة بيسمتعوا وبيعيشوا في قصوره اكتر منه .. شئ غريب مش كدة


الحياه شئ غريب وقوانيها صعبه الفهم .. والشئ الأكيد منه اننا فاهيمنها غلط

وطبعا حنلاقي الناس منقسمين علي نفسهم في حكاية فهم الحياه

ممكن نلاقي اخونا المتدينين من المسلمين او المسيحين او اخرون ردهم الوحيد :

الدين فسر وجاء بكل الحكمة

الحياه فانية والأخره دائمة .

مع احترامي .. الحياه بالنسبة ليهم مجرد كوبري للوصول للآخره مش اكتر

ورغم كلامهم دة تلاقيهم بيسمتعوا بملاذات الحياه اكتر من اي حد تاني

ممكن نلاقي الزهاد والمعتزله والمتوصوفين في كل مكان في العالم .. وكل فئة لها تفسيرها المختلف عن التاني للحياة وكل تفسير مقنع ومنطقي رغم انهم مختلفين في بعض الأحيان.

في وصف ظريف للفلسفة :هي ان تعتزل الحياه لكي تفهمها بصورة افضل

وانا قررت اني مش حكون فيلسوف وحعيش الحياه وفقا لقوانيني الخاصة اللي في الغالب غلط

فريد سالم

1/3/2010